卡通片

今日假期第一日，無咩嘢做走去睇咗套戲，之所以會睇呢套戲係因為前喺Facebook有人 share 套戲嘅預告，俾佢吸引咗，而且平日返工壓力太大，睇返戲卡通片嚟笑吓，舒緩吓壓力都唔錯，其實卡通片都唔一定係小朋友睇嘅，成年人睇天真吓笑吓都唔錯吖，香港人壓力太大喇，適當時候要俾自己輕鬆吓，唔係好易爆煲㗎！

可怕的書枱

呢個故事是係個朋友同我分享嘅, 係佢自己嘅親身經歷, 我聽咗之後都寒一寒, 而佢自己就話, 發生咗件事之後就不敢再喺街上亂執嘢喇。

其實這件事都發生咗好耐, 但佢記憶仲係好深刻, 佢細細個嗰時好窮, 真係買咩都要諗得好清楚, 有一日佢放學行返屋企時, 經過垃圾站佢見到一張鐵造嘅書枱, 佢見唔係好舊又無咩爛, 而且自己又想要有一張書枱, 所以佢就搵埋佢兩個妹一齊搬張書枱番屋企。番到屋企之後佢就將張枱放喺廳, 抺一抺佢, 然後就食飯, 無理會張枱。

佢同兩個妹係同一間房, 但當晚佢因為實在太攰喇, 咁就喺廳度瞓著咗, 但瞓瞓吓佢突然聽到有腳步聲, 初時都以為自己發夢, 但個人開始慢慢清醒, 聽到嘅腳步聲亦都越來越清楚, 不停咁喺佢梳化旁邊行來行去, 佢亦都越來越驚。但最驚嘅事情之後先發生。

突然間腳步聲無晒....變到好靜好靜.....當佢以為無事嘅時候, 佢聲到個張枱發出咗聲音, 佢好留心咁聽, 原來係個柜筒又開又閂嘅聲, 不停咁又開又閂....呢一刻佢已經驚到標晒冷汗, 但又唔敢出聲, 只好繼續扮瞓, 都唔知等咗幾耐先等到天光, 佢就即刻同佢屋企人講呢件事, 然後就將張枱搬返去垃圾站。因為呢件事之後就算佢幾窮, 嗰件嘢好新都好, 佢都唔會再亂執嘢番屋企。